ZÂWLPALA NIH ZÂWLMAKA

 ZÂWLPALA NIH ZÂWLMAKA (A folktale of the Darlong)

Focalizer: Rev. C. Thuamdinga Darlong (82) of Saibual Village of the Darlong, Date of Collection: 17/09/2022

Language of the narrative: Darlong

Zâwlpala nih Zâwlmaka hi tlangvâl vêve an changa. Zâwlmaka hi inchongnâi, Zâwlpala hin rochu ichai, inriângnâi a chang. A changa Zâwlpala hi a ṭhat êm êm a, mi ṭong hom inngai, ikapai ṭhiâm, mi thu âwi a chang. Ma tlangvâl hei chun nunghâk khatka anneia, ma nunghâk chu 'Tuâlvungi'. Tuâlvungi hi nunghak hmêlṭha, a nin di vêve a chang. A changa Tuâlvungi hin Zâwlpala hi ândi, inchongnâi a chang homin Zâwlmaka hi ândi nawh. A nunchang ikapaia hin Zâwlpala hi ândi. A changa an kâra hin ma inchongnâipa Zâwlmaka hi a loi tlâk ve thap thap ṭhin a chang, ani in a ngêp nghâla ichai nai a chang hate, a niin a zak nghâla, a luâin a hâwi a chang Tuâlvungi hin. Voika chu an tui inding a hin, tui inding hi a sâwk pêk vêve a an bu nêk ding a hin, a tlangvâl ditloipu Zâwlmaka inding a hin tûr a phul pêka, a tlangvâlpa Zâwlpala tâ a chun a phul nawh. Mangka chun tui an inle inṭhialin Zâwlmaka inding tui ha a tlangvâlpa Zâwlpalan a inle te Zâwlpalan thînain a hmang ta a chang. A tlangvâlpa a san a tumpu ha a thi pêk tak. Maha Zâwlpala a thi han Tualvungi a sûn ding han an va koi, Vahui te an tira. Ma Vahui tê chun mangka hin a vakoi:

           Hui e, Hui e, Hui e, Hui e, Tiana Zâwlpala â thi, Tuâlvungin ruâk va rêl rawh,

E! Zâwlpala a thi chute atia a sûn ding chun anu nghâknu Tuâlvungi chu an thoka,

Tuâlvungi chun hla a sak ve a,

               Zâwlmaka in-ding kitia tûrtui haiten kê dona,

                  Zâwlpalan fam nân a hmang,  [Tuâlvungi Ṭaphla]

Ma tina chu,

A tlangvâlpa dam aw dinga a thaw, a tui tur a tlakloipu ha a hnel pu han a ina, tur a tlakpu-a ha a tlangvâlpa in a in pêk hate,

Lampuia a hong kala a ṭhatlaia leilâk a daw heiha a hong hmua hla a hong phuâ nâwka,

Zâwlpala leilâk i daw hi leilak inphir ten a daw, a kal ding chu keima Tuâli, Tuâli thâi chang ro ki chang e, ati chu, a hong I phua.

A hong kal tira a tui kuâng huât a hong hmua, hla a hong phua nâwka,

Zâwlpala pangpêm I huat hi Pangpêm inṭhian ten a huât, a thâl ding chu keima Tuâli, Tuâli thâi chang ro ki chang e, a hong ti nâwk chu.

Ma a Pangpêm huâta nghâkhmun (Tlâithlân) a daw Tlâithlân ei iti ṭhin hi a hmu han a hong phua nâwka,

Zâwlpala Tlâithlân I daw hi Tlâithlân inṭhian ten a daw, ân ngha ding chu keima Tuâli, Tuâli thâi chang ro ki chang e, a hong i ti nâwk.

Mangka han ahong kal kala Naipang pâwi inkap a hong hmua, Naipang ki tute hei Zâwlpala thlân ten maw om?

Naipang te hei chun, Zâwlpala thlân tlânga chun e, khuâng ṭhua vâi an tlar bunga,

Sa tin hrâng lû tlar binga, antia

Zawlpala thlân niva hmu inte aw pi, ma thlâna han pâr kung e Salu intlar dur ka e va hmu neti ha antia, hla in Naipang te heiin anloi hrila,

Ava a a thlân chu ava hmû a, a tap-a, A tap a tap le a lua a samtola sarikulhmul a itol han a suna a sun pasun ha hawi loi hate mangka chun Tuâlvungi hom chu a thi.